اليوم العالمي لذوي الهمم.. 7 علماء مسلمين تحدوا الإعاقة (إنفوجراف)
- الثلاثاء 03 ديسمبر 2024
- بواسطة أحمد حمدي
- الثلاثاء 03 ديسمبر 2024
شعبان القاص يكتب: عم حجازي والإلحاد (2).. الملحدة هدى مصطفى
- جداريات 2
- السبت 28 ديسمبر 2019, 8:21 مساءً
- 2284
الكاتب شعبان القاص
حين عدت إلى قريتي، ذهبت من فوري إلى عم حجازي، جلست معه على "دكتة" الخشبية تحت شجرة الكافور التي أمام بيته، نسمات الهواء المنعشة غطت على علامات الكدر التي كانت تظهر وتختفي على وجهي.
قال متهكماً كعادته وهو يرشف الشاي: ها عملت أيه يا شملول؟
أخبرته أني نحيت كتاباتي جانباً، ونشرت كلامه الذي وجهه لكل ملحد، قلت في سعادة وأنا أستمتع مثله بالشاي المنعنع:
كلامك كان في الصميم يا عم حجازي.
لمح الرجل ما بي من كدر وقال:
مش باين، قول إيه اللي مضايقك؟
- الجماعة دول حتى لو اقتنعوا أن لهذا الكون إلها، عاوزين إله على مزاجهم، إله زي ما بيقولوا ينصف المرأة ولا يحد من حريتها وحريتهم، إله لا يحرض على العنف و...
قاطعني:
- باختصار هم عاوزين إله غير الله الذي نزّل القرآن على سيدنا محمد.
- تخيل يا عم حجازي إنه فيه واحدة مسلمة اسمها هدى مصطفى كتبت على صفحتها في الفيس شتيمة في سيدنا النبي بسبب إنه تزوج السيدة عائشة وهي بنت 6 أو 9 سنين وأنه دمر حياتها لما حرم عليها الزواج من بعده وكمان جابت سيرة ستنا صفية و...
- متزعلش قوي كدا دي مش هدى ولا حاجه دا تلاقيه واحد ومش مسلم كمان من اللي ربنا قال فيهم: "وقالت طائفة من أهل الكتاب آمنوا بالذي أنزل على الذين آمنوا وجه النهار واكفروا آخره لعلهم يرجعون" .
- مش فاهم؟
- يعني يحسسك إنه كان مسلما وبعدين معجبهوش الإسلام علشان وهو خارج منه ياخدك معاه
- بس الكلام ده أنا سمعته من ستات وبنات مسلمين كتير اليومين دول شكلهم تأثروا بـ...
- لو كانت هدى دي شخصية حقيقية تبقى مسكينة فعلا وتلاقيها بتتكلم عن مأساتها هي مش مأساة السيدة عائشة.
- قصدك إيه يا حاج؟
- الست دي لو كان لها زوج مؤمن ياخدها في حته فضا ويعمل معاها سباق في الجري ويخليها تسبقه، وكل ما يجي يصلي يعطيها "بوسه"، وتستخبى ورا ضهره لما يجي أبوها يضربها، ما كانت قالت على ستنا الكلام اللي قالته، الست هدى دي ما عرفت شيئا عن ستنا عائشة، ستنا اللي كانت تحب سيدنا النبي صلى الله عليه وسلم وتغار عليه، لدرجة أنها لما جابت له إحدى زوجاته طعام، وهو عندها كسرت الطبق قدامة، وقدام الموجودين من شدة الغضب، وهو ما عمل حاجة غير إنه قال: "غارت أمكم.. غارت أمكم يعني زي ما بتقولوا كده تفهم نفسيتها، وكانت تراجعه ف الكلام، وكانت تتدلل عليه، لكن لما هجرها شهرا وخيّرها ما بينه وبين الطلاق اختارته، هو وهي عارفه إن ربنا اختارها تكون زوجة قدوة وأما للمؤمنين توهب نفسها للتعليم والعبادة.
- إنت عارف ليه إحنا بنقول عليها الصديقة بنت الصديق؟
- ليه يا عم حجازي؟
- لأن ربنا اختارها كيفما اختار ستنا مريم اللي اختارها لمهمة عظيمة وسماها "صديقة"، وحكاية السن دي مقصودة علشان تعيش بعد سيدنا النبي تمارس دور القدوة والتعليم بنفس المهابة والاحترام اللي كانت للنبي، وحكاية 6 سنين أو 9 دي مسألة تاريخية مش دقيقة وفيها نظر، يعني لا هي قرآن ولا سنه تبيح زواج البنت قبل البلوغ.
- الست هدى دي مسكينة قول لها عم حجازي.
راح يدعو ربنا تقابلي في حياتك حب زي اللي شافته ستنا عائشة اللي كانت تتسابق مع زوجها، مرة تسبقه ومرة يسبقها، ولما سألوه من أحب الناس إليك هتف باسمها من غير تردد ولا خجل على غير عادة الرجال في زمنه، واستأذن زوجاته ان تمرضه ومات بين سحرها ونحرها ، قول للست هدى دي ما في واحدة تعيش حياة زي اللي عاشتها ستنا عائشة إلا بالحب، الحب اللي ربنا بيحطه في القلوب،الحب اللي بيرتبط بالحق والخير ، زي حب ستنا صفية للنبي كده...
- أيوه يا عم حجازي لاحسن الموضوع دا عاملين فيه مناحة.
قام عم حجازي ودخل بيته وهو يداري دمعتين تترقرقان ويقول: بعدين يا ولدي بعدين.
